Коце Трајановски, Градоначалникот на Град Скопје, заедно со Никола Груевски, Премиерот на Република Македонија, денес на Плоштадот „Македонија“, ги промовираше првите 11 унифицирани стилски тезги, наменети за продажба на книги и на печатени публикации.
– Град Скопје, со цел да ги збогати содржините на најфреквентните места во центарот на градот, постави 11 стилски тезги што соодветствуваат со амбиентот во којшто ќе бидат и поставени, а со единствена намера да им понудат на минувачите полесен пристап до омилените книжевни наслови како и да ги задоволат литературните вкусови на граѓаните на Скопје. На овој начин, Град Скопје ќе им излезе во пресрет и на Издавачките куќи за поедноставна промоција и приближување до читателите, како и на физичките лица коишто веќе подолго време бараа соодветен простор за пласман на голем број македонски и странски ретки книги и публикации. На овој начин се надевам дека книгите ќе бидат навистина близу до скопјани, рече градоначалникот Трајановски.
Единаесетте тезги се наменети исклучиво за книги и за печатени публикации. Градот им ги додели на седум физички и четири правни лица, кои ги исполнија пропишаните критериуми, од неодамна распишаниот конкурс. Четирите правни лица се: издавачка куќа „ТРИ“, издавачка куќа „Ѓурѓа“, издавачка куќа „Табернакул“ и издавачка куќа „Дијалог“, коишто на тезгите ќе им понудат дел од своите печатени публикации.
Тезгите ќе бидат лоцирани во централно градско подрачје, на улица Македонија и Плоштадот „Македонија“. Една од тезгите се наоѓа пред старата кафеана Пелистер, друга во близина на кафе барот Тренд, пред бутиците Мона и Тера Нова, пред продавницата на Краш , пред тревникот кај македонски телекомуникации и уште четири поставени по должината на улица Македонија, почнувајќи од Спомен куќата на Мајка Тереза, па се до Хотелот Бристол пред Музејот на град Скопје.
