Изложбата на фотографии „Вертикали и премини“ од авторот Анастас Ќушкоски, синоќа (среда, 28 ноември) беше отворена во Уметничката галерија во Куманово.
Изложбата опфаќа триесетина фотографии кои се дел од дваесеттата изложба на авторот во која тој се навраќа на македонското традиционално градителство, односно, урбаниот простор на oхридско-струшкото крајбрежје. Изложбата во Уметничката галерија во Куманово ќе биде отворена наредните две недели.
Ќушкоски на вљубениците во фотографијата им го разоткрива феноменот на вертикалите и премините, толку типични за овие простори, а сепак неoбични и привлечни.
– Фотографијата е моја пасија со која интензивно се занимавам од 80-те години на минатиот век. Ова е мое второ навраќање на темата македонско традиционално градителство,со акцент на урбаната архитектура, опфаќајќи ги двата града на Охридското езеро со сите нивни специфичности, вели авторот.
Анастас Ќушкоски е познат драмски автор, поет, истражувач, сценарист и режисер.