Краткометражниот игран филм со целосен наслов “Човекот со чудна навика да ме удира со чадор по глава” на режисерот Вардан Тозија е добитник на Сребрен Џед во официјална конкуренција на интернационалниот филмскиот фестивал во Луксор, Египет.
Наградата “Сребрен Џед” (џед – антички египетски хиероглифски симбол) во категоријата краток филм на фестивалот овој пат тричленото жири се одлучи да ја додели за прв пат кај македонски автор.
Џедот е стар Осириски божји симбол кој ја означува сржта на препородот, новиот почеток.
Оваа награда е всушност нов почеток на фестивалскиот живот кој следи за филмот “Човекот со чудна навика да ме удира со чадор…”
Филмот е финансиски потпомогнат од страна на Филмскиот Фонд на Република Македонија. Сценариото е инспирирано од краткиот расказ на аргентнскиот писател Фернандо Сорентино. Оваа фелиниевска комедија, распослана низ сивилото на правливите сокаци и напукнатите згради на Скопје, ја раскажува приказната за Петар, локален маргиналец и дежурен губитник, чиј секој нареден ден е полош од претходниот – главно поради неговата инертност, повлеченост и неспособност да се справи со сопственото секојдневие. Се’ додека, еден ден… мистериозен, безимен, молчелив посетител не се појави од никаде и комплетно го менува животот на Петар…