Што му треба на човекот за да биде самиот тој, доследен на својата личност, е основната идеја во „Лет над кукавичкото гнездо“, рече режисерот Александар Морфов, за претставата со која театарот „Иван Вазов“ од Софија утревечер ќе гостува на „МНТ Фест“.
Познатиот бугарски режисер денеска на прес-конференција рече дека избрал сосема поинаква драматуршка линија, различна од истоимениот филм на Милош Форман, иако се зачувани некои препознатливи сцени. – Излеговме од клишето на филмот на Форман и од пиесата на Васерман, која беше популарна во социјализмот, и работевме по романот на Кен Кизи.
Идејата беше да го најдеме современото значење и се покажа дека не е тешко. Романот е актуелен иако е напишан пред 40 години. Како последица на животот што го живее, човекот престанува да биде тој и да биде личност. Над 35 проценти од луѓето живеат со психички нарушуања, притиснати од секојдневните проблеми, даноци, такси, политика… Минатата година имаше масовни самоубиства и самозапалувања и тоа добива епидемиски карактер и Бугарија не е единствен случај. Ова е минимодел на општество, за човек кој нема проблем да биде своето јас, рече Морфов. За процесот на работа посочи дека не се разликувал од другите негови претстави – темелна подготовка и читање, но и разговори со психијатри и со луди луѓе, а за да нема влијание, не го гледал филмот на Форман додека ја правел претставата.
– На почеток им давам слобода на актерите за импровизација и тоа полека се претвора во драматургија и сцена, рече Морфов за претставата која по четири години од премиерата и над сто изведби пред полна сала, првпат гостува во странство. Се работи за голема продукција, дојдени се 25 актери и три камиони сценографија.
Уметничкиот директор на МНТ Дејан Пројковски истакна дека Александар Морфов е еден од најзначајните режисери во Европа кој, како што рече, ја наметнува и диктира естетиката на современиот театар.
– Како студент во Софија, израснав со неговите претстави и имам увид во целото негово творештво, рече Пројковски. Претставата трае околу три пол часа, ќе почне во 20 часот, а утре напладне МНТ ќе организира и отворена средба со Морфов на тема „Мојот театар“. Тој и е познат на македонската публика зашто негови претстави гостувале на Охридско лето и на фестивалот МОТ, а има соработувано со Битолскиот театар за претставата „Декамерон“.
Првиот „МНТ Фест“ почна вчеравечер со претставата „Вечната куќа“, која беше прекината поради невремето што го зафати Скопје.
– Театарот функционира нормално и без проблеми. На сцената работиме со полна пареа. Театарот е целосно осигурен од елементарни непогоди и од кражби, рече уметничкиот директор Пројковски.