Година, за првпат на 11-то издание на фестивалот на европски филм „Синедејс“, во соработка со италијанската агенција „ИнАкто“, ќе се одржи „Ревија на италијански филм“, чии проекции ќе се прикажуваат во периодот од 17 до 21 ноември во „Кинотека на Македонија“.
На „Ревијата на италијански филм“ ќе бидат прикажани 8 филма, ќе гостуваат познатите италијански режисери Даниеле Гаљаноне, Џанлука и Масимилиано Де Серио, продуцентот и раководителот на продуцентската куќа „Индика“ – Микеле Форнасеро, директорката на секторот за маркетинг на „Торинската филмска комисија“ – Анџелика Кантисани, уредникот и потпретседател на филмскиот портал Cinemaitaliano.info – Карло Гризери и сопственикот на телевизиската куќа „Текла ТВ“ Џанлука Ору, која е главен медиумски покровител на настанот.
Италијанската програма ќе биде отворена на 17 ноември (сабота) од 18:00 часот со филмовите “Пјетро” и “Р’ѓа” на Даниеле Гаљаноне. Исто така, ќе бидат прикажани и проекциите на филмовите: „Седумте милосрдни дела“ на Џанлука и Масимилиано Де Серио, „Ехо“ на Андреа Ла Мендоло, „Деловен човек“ на Џулиано Монталдо, “Скапоцен камен” на Андреа Молајоли и „Работници – спремни на се“ на Лоренцо Евигноло.
На 17 и 18 ноември во просториите на „Кинотека на Македонија“ со почеток од 12:00 часот ќе се одржат и две работилници со гостите на италијанската програма на тема: “Ретроспектива на развојот на филмската индустрија во Италија и Западна Европа” и “Влез на филмскиот пазар како нови надежни режисери/продуцентски куќи во 21 век”.
Билетите за италијанската програма ќе може да се купат во “Кинотека на Македонија” по цена од 100 денари.