Поетскиот фестивал „Струшки вечери на поезијата“ и УНЕСКО годинава по 11-ти пат го распишаа конкурсот за интернационалната награда за дебитантска книга од млад поет „Мостови на Струга“ за 2014 година.
Авторите кои ќе испратат дебитантски книги не треба да бидат постари од 35 години. Најдоцна до 28 февруари, заинтересираните треба да испратат пет копии од книгата со која конкурираат, како и најмалку пет песни преведени на англиски јазик на адресата на Струшки вечери на поезијата (поштенски фах 109, 6330 Струга, Република Македонија, struga@svp.org.mk) или преку Националните комисии за УНЕСКО на државите членки.
Апликацијата може да се поднесе и во електронска верзија на адресата на СВП: struga@svp.org.mk, при што книгатa треба да биде во електронски формат, а печатената верзија на книгата да пристигне на адресата на СВП најдоцна до 5 март.
Лауреатот ќе биде објавен на Светскиот ден на поезијата, 21 март, а ќе добие статуетка, паричен износ и објавување на книга на поетот–лауреат во превод на македонски.
Поетот–лауреат ќе биде поканет да учествува на изданието на Струшките вечери на поезијата на крајот на aвгуст, каде и ќе му биде врачена наградата на манифестацијата „Мостови“.