Италијанските оперски ѕвезди, сопранот Барбара Фритоли и баритонот Лео Нучи, во придружба на уметниците на Македонската филхармонија, под диригентско раководство на маестро Луис Горелик, вечер, на сцената на Античкиот театар, ќе го отворат 54-то издание на најголемата музичко-сценска манифестација во земјата, фестивалот „Охридско лето“.
Уметниците од Италија уште по пристигнувањето во Охрид изразија задоволство што имаат чест да бидат тука, да се претстават пред македонската публика во овој за нив егзотичен дел од светот. Ѕвездите на свеченото отворање вчера ги прими и претседателот на Република Макеоднија, Ѓорѓе Иванов, кој како покровител на манифестацијата ќе го отвори годинешното фестивалско издание.
Наредните 40 дена до 20 август Охрид ќе биде местото на големи концерти, театарски претстави, со ексклузивни уметници од кои за повеќето од нив тоа ќе биде премиерно нивно претставување во овој дел од Европа.
– „Охридско лето“ е една од посебните културни манифестации, фестивал што има мошне чувствителна публика, верна публика која ја препознава и ја сака културата. Факт што денеска фестивалот го почнува 54-то издание сам по себе значи дека тоа е манифестација што опстојува, и не само тоа, туку заслужен член на Европската асоцијација на фестивали, манифестација што постојано се развива и од година во година добива на квалитет. И самото место на негово одржување е специфичност, како своевиден културен светилник на самите граници на континентот, изјави за МИА Масимо Мерчели, потпретседал на Европската асоцијација на фестивали.
Мерчело кој ќе присуствува на свеченото отворање на годинешното „Охридско лето“, забележа дека и вечерашниот концерт со најдобрите оперски пејачи од Италија е само уште една потврда на високото реноме што го поседува и надградува „Охридско лето“.
За иднината на големите културни манифестации како што е „Охридско лето“, Мерчели изјави дека тајната за успехот е во постојана потрага, постојана надградба на ваквите, како што рече, „вистински културни настани, а не во шоу-бизнисот“.
Музичкиот дел од фестивалската програма нуди изобилие од звучни имиња, потврдени уметници, атрактивни фестивалски настани. Тука се настапите на пијанистите Елизавета Леонскаја, Аркадиј Володос, волинистите Кирил Трусов, Нинг Фенг, виолончелистот Нарек Хакназариан, Кадеша дуото од Албанија, камерниот оркестар „Св. Ѓорѓе“, гудачкиот квартет Јанкелиевич, ансамблот Вариабиле… За пошироката публика во Охрид ќе видиме и неколку светски атракции, чии имиња и настапи се дел од најпрестижните светски музички сцени, настани што претставуваат вистински ексклузивитет. Меѓу нив се концертите на хрватскиот пијанист Максим Мрвица, „Моцарт групата“ од Полска, сензационалните вокалисти, но и актери од израелската перформанс група „Вока пипл“, како и целовечерниот концерт на кинескиот Симфониски оркестар „Шенжен“. За роденденот на фестивалот 4 август публиката во Охрид ќе има можност да ужива во настапот на еден поинаков Немања Радуловиќ, светски познатиот виолинист кој како што беше најавено заедно со групата „Ѓаволски трилери“ ќе понуди несекојдневна атрактивна програма, со нови звучни димензии.
Драмскиот дел од фестивалот содржи девет најнови продукции, од кои две премиери, како од домашните театарски куќи, така и со гостувања на звучни имиња од меѓународната театарска сцена. Самиот избор на претставите ветува несекојдневни уметнички доживувања, претежно комедии, топли претстави со ведар дух, под закрилата на класиката и високата уметност.
Драмската програма започнува со „Отело“ во изведба на Битолскиот народен театар, „многу врева за ништо“ на Театар „Комедија“, праизведбата на „Аферата Елсинор“ на Љубиша Георгиевски во изведба на МНТ, „Ждрело“ во изведба на Драмскиот театар од Скопје. Од македонската драмска сцена тука е уште и настапот на Албанскиот театар со претставата „Предавање“ на текст на познатиот Мартин МекДонах.
Од гостувањата во драмскиот дел на фестиваслките сцени во Охрид ќе ги видиме суптилната комедија „Како шпо милувате“ во изведба на „Њу битом“ театарот од Полска, „Његош и ја“ во изведба на Црногорското народно позориште од Подгорица, „Женидба“ од Гогољ во продукција на „У-моста“ театарот од Русија.
Затворањето на ова фестивалско издание годинава ќе биде токму од драмскиот дел на програмата, со претставата „Роденденот на господин Нушиќ“ во изведба на Звездара театарот од Белград, претстава на текст на познатиот режисер Душан Ковачевиќ, а во изведба на познати актери од глумиштето во регионот, предводени од Бранислав Лечиќ.