На 31 Октомври во Музичкиот Центар “Борис Христов” во Софија, со свој концерт ќе се претстави Дуо Кировски …
Маја Шутевска-Кировска на пијано и Љубиша Кировски на виолина и виола, пред публиката во Софија ќе се претстават најпрво со пет пиеси за пијано и виола од балетот “Ромео и Јулија” од С. Прокофјев, делото за пијано и виола од Е.Илиевска-Бете “Dancing with my shadow”,посветено на Дуо Кировски,” Сонатата за виолина и пијано” од Џ. Корилјано и делото “Вечера немаме” од Д. Бужаровски, исто така специјално посветено на ова познато македонско музичко дуо.
Концертот на Дуо Кировски во Софија е во организација на Културно-информативниот центар на Република Македонија во Софија, а проектот поддржан од Министерството за култура.
Камерното дуо Љубиша Кировски (виолина/ виола) и Маја Шутевска – Кировска (пијано) е оформено во 1993 година. Од основањето до денес дуото има реализирано бројни настапи во Македонија, но и на меѓународните концертни подиуми во: Хрватска (Загреб, Осијек, Риека и Пула), Србија (Белград – БЕЛЕФ фестивал Нови Сад, Врњачка Бања), Црна Гора (Подгорица), Полска (Варшава, Краков, Лоѓ), Италија (Трст, Фиренца), Швајцарија (Лозана), Бугарија, Велика Британија, САД, Германија,а во Македонија на Охридско лето, Златна лира, Скопско лето, Хераклејски вечери, Есенски музички свечености, Денови на Македонската музика итн), настапувајќи секоја година со премиерна програма во Салонот 19, 19.
Репертоарот на дуото опфаќа дела од барокот, до музиката на 20 век со над 50 сонати за виолина и пијано. Дуото посебно го негува македонското музичко творештво, редовно изведувајќи дела од македонски композитори, од кои голем број на дела се посветени токму на Дуо Кировски. Во 2011 година имаат концерти во Њујорк, Лондон и Скопје со дела од македонски композитори посветени на дуото, а во 2012 премиерно го изведуваат двојниот концерт за виолина и пијано од Димитрије Бужаровски со Македонската Филхармонија, кој е воедно и посветен на нив. Во 1999 го имаат снимено својот прв компакт диск во живо од фестивалот Охридско лето.
Добитници се на наградата Виртуози во категоријата најдобар камерен ансамбл за 2013 година, кога ја одбележуваат 20 годишнината од своето музичко постоење.