Министерот за култура на Република Македонија, Елизабета Канческа–Милевска утре (понеделник, 14 ноември 2011 година) ќе престојува во еднодневна официјална посета на Кралството Шведска.
Во рамките на посетата, Канческа-Милевска ќе оствари билатерална средба со министерот за култура и спорт на Кралството Шведска, Лена Аделсон – Лијерот. На средбата ќе стане збор за досегашната соработка меѓу двете земји во областа на културата, но и за понатамошните активности преку кои Македонија и Шведска ќе ги интензивираат културните врски.
Како дел од посетата, министерката за култура Канческа-Милевска ќе оствари неколку работни средби со директори на институции од областа на културата во оваа земја, меѓу кои ќе се сретне со директорот на Музејот „Нобел“, Олов Амелин, како и со генералниот директор на Уметничкиот совет на Шведска, Кенет Јохансон.