Од денес (четврток, 23 август), па се до 3 септември во Богданци, петта година по ред ќе се одржи единствената графичка работилница од ваков вид во Македонија и на Балканот.
На неа учество ќе земат 14 млади автори од Македонија и од странство (Србија, Црна Гора, Хрватска, Бугарија, Босна и Херцеговина и Словенија).
Од Печатница „Софија“, која е организатор на работилницата, велат дека целта е на младите и талентирани автори да им се овозможи размена на искуства и услови за реализација на нивните дела, бидејќи поради условите во кои се работи, графиката како техника е помалку застапена во целиот регион. Ментор на годинешнава работилница ќе биде реномираниот професор Радован Јандриќ од Ликовната академија во Нови Сад.
Завршните дела ќе бидат изложени во галерискиот простор на Печатница „Софија“ во Богданци, а по завршувањето на работилницата се предвидени изложби во повеќе градови низ Македонија, како и во други земји на Балканот. Работилницата оствари контакти со многу познати светски графички работилници и во иднина не е исклучена можноста за заемна соработка.
Графичката работилница „Софија“ првпат се одржа во 2008 година. До сега низ неа продефилираа над 60 млади уметници од целиот регион. Улогата на ментори ја имаа истакнати графичари и универзитетски професори од Македонија, Србија и Хрватска.
