Денес, (петок, 10 јуни 2011 година) во Белград, Република Србија се одржува Седмата министерска конференција на УНЕСКО за заштита на културното наследство на земјите од Југоисточна Европа.
Организатор на овогодишната конференција е Министерството за култура, информирање и информатско општество на Република Србија и Регионалното биро на УНЕСКО во Венеција. Македонската тричлена делегација ја предводи заменик – министерот Драган Недељковиќ.
Главни теми за кои се дискутира се: како да се развие иницијативата за јакнење на културното наследство и дијалогот во регионот со учество на граѓанскиот и приватниот сектор, како конкретно да се зајакнат иницијативите за регионалната соработка, како да се овозможи одржливост на културниот туризам, едукација на младите кадри, одржливост на културното наследство, како и негова навремена заштита во време на кризи.
Одржувањето на 7-та министерска конференција претставува континуитет на одржување на министерските средби за културно наследство и регионалните самити на претседатели на држави кои се реализираат секоја година во различна држава, а под покровителство на УНЕСКО. Овие средби даваат посебен придонес и енергија за заемна соработка и успешна реализација на координативни активности на земјите на ЈИЕ во областа на културното наследство.
Потсетуваме дека Министерството за култура беше домаќин на 3-тата министерска конференција, одржана 2006 година во Охрид.
