Овој петок (29 март, 2013) за првпат во Сектор 909 и Македонија ќе гостуваат детроитскиот техно диџеј Claude Young и јапонскиот DMC шампион Takasi Nakajima кои од 2007-ма година продуцираат и настапуваат како Different World.
Claude Young е по малку заборавен техно херој, диџеј со неверојатни способности кој пред 10 години одлучува да се повлече од сцената и настапите поради целиот товар кој го носи диџејството. Takasi Nakajima го запознава во Токио во 2005, каде живеат и двајцата, и брзо стануваат блиски пријатели со заедничка љубов за електронската музика, хипхопот, скречувањето и продукцијата.
Првиот заеднички настап го имаат на Detroit Movement Festival по што започнуваат континуирано да настапуваат. Во своите настапи користат грамафони, цд плеери и Ableton и пуштаат голем број на сопствени неиздадени едити на траки кои им се допаѓаат. Тие издадоа ремикси за Octave One и Phil Agosta а нивната трака Think Twice се најде на Berghain 05 на Marcel Fengler. Нивни следен проект е Different World Records каде следниот месец ќе ја издадат првата плоча “They Live”.
Во моментов се на европска турнеја и македонската публика ќе има уникатна можност да го чуе нивниот 4 часовен сет во Сектор 909. Како загревање ќе настапи Самоил Радински, кој пред неколку месеци сними микс за подкаст серијата на Different World.
