Струмичани, но и граѓаните од цела Македонија по трет пат ова лето ќе можат да уживаат во богатата понуда на ,,Струмица опен фестивал‘‘.
Годинашното издание на фестивалот е збогатено со нови содржини кои ќе го направат побогат и поквалитетен од претходните две години. Во единаесетте фестивалски денови од 7 до 17 август ќе се случат 28 настани на десет отворени летни културно-уметнички и забавни сцени.
Покрај богатата културно-уметничката програма, последните три дена се резервирани за настапите на Тајзи, Бајага со Инструктори и Кирил Џајковски на 15 август, Бендовите САРС и Амадеус плус ексклузивни DJ-и на 16 август и најголемата балканска ѕвезда Здравко Чолиќ придружена од младите македонски таленти Александра Јанева и Коста Хаџикојчев на 17 август.
Минатата година бројот на посетители во сите фестивалски денови се движеше меѓу 180 илјади и 200 илјади посетители, оваа година очекувам уште поголема посета и уште поголемо задоволство на граѓаните“, рече градоначалникот Заев.
Фестивалот го организира здружението „Културен забавен живот“ со поддршка на општина Струмица.