„Соба со пијано“ претставен на маркетот на Берлинале

„Соба со пијано“ во режија на Игор Иванов доби позитивни критики на Европскиот филмски маркет на Берлинскиот филмски фестивал.

posterСпоред филмските критичари Јелка Рочен од Словенија и Александар Шлиг од Германија, идејата и црвената нишка водилка во филмот е одлична: Се забележува дека филмот е сработен со малку пари – нема гламур, ја има минималистичката нота, но и интересниот печат на уметничко режисерско остварување кое, иако без големи претензии, остварува резултат кој пленува.

– Многу добра камера, многу добри актери, перфектен сетинг, добра уметничка режија, добра музика. Посакувам филмот да обиколи многу фестивали и сметам дека ќе добие бројни пријатели, истакна за „Дојче веле“ германскиот продуцент и филмски експерт Марчело Бузе по проекцијата на филмот.

Задоволни од прикажувањето на Филмскиот маркет на Берлиналето се и режисерот Игор Иванов и продуцентот Томи Салковски.

– Целиот фестивалски живот на „Соба со пијано“ го планираме за оваа – 2014 година. Практично сега, со Берлиналето кое ја отвора сезоната на големите фестивали, започнуваме да преговараме каков ќе биде фестивалскиот живот на филмот. Она што е важно е дека сакаме да му овозможиме што подобра меѓународна проомоција и да допре до онаа публика за која е наменет, истакнува режисерот Игор Иванов за „Дојче веле“.

И продуцентот Салковски очекува успешна фестивалска година за „Соба со пијано“. – Мислиме дека филмот ќе има долг живот и во наредните две години ќе настапува на бројни фестивали каде се цени уметничкото филмско остварување. Сакавме филмот да биде во официјалната конкуренција на Берлиналето. Го гледавме само како номиниран меѓу 20-те во борбата за Златната мечка. Не бевме заинтертесирани да го има во некоја од другите придружни програми, подвлекува Салковски, според кого по Берлин започнува меѓународната промоција и диструбуција.

SobaSoPijano01_EFM Berlin

„Соба со пијано“, кој премиерно беше прикажан во септември на отворањето на 34. ИФФК во Ботла, е селектиран во натпреварувачкиот дел на белгардски ФЕСТ. Има и уште неколку договорени фестивали, но информациите се под ембарго, зашто програмата и учеството на некој филм мора прв да ги објави организаторот.

Иванов за „Дојче веле“ открива дека планира снимање документарен филм за групата „Мизар“. – Тоа е првата македонска рок-група која издаде плоча на македонски јазик, која имаше влијание врз музичката сцена на Словенија, Хрватска, но и во Австралија. Тие произлегоја од една скопска андерграунд сцена. Се уште се живи и здрави и сметам дека е вистинско време да се направи еден ваков документарен филм. Тоа е она што сакам да го направам во 2014, изјави Иванов кој работи и на голем проект за браќата Манаки.

– Паралелно работиме и на еден класично европски филм – стандардно нискобуџетско пакување, кое се случува кај нас, овде и сега, во овој простор и време, истакнува за „Дојче веле“ Игор Иванов.

You May Also Like