Сојузот на клубовите на младите техничари и природници на Македонија, денеска (10 мај 2014 година), го организира 51-от Државен натпревар, кој ќе се одржи во основното училиште „Ванчо Китанов“ во Пехчево.
На натпреварот ќе учествуваат 312 ученици од основните училишта од Република Македонија кои освоиле први места на регионалните натпревари. Учениците ќе се натпреваруваат во 23 дисциплини: агротехника, автоматика, астрономија, астронаутика, бродомоделарство, воздухопловно моделарство, градежништво и архитектура, екологија, електроника, конструкторство, метеорологија, кино и видео техника, компјутерска техника, применета биологија, применета географија, применета математика, применета физика, применета хемија, радио техника, ракетно моделарство, роботика, сообраќајно моделарство и фото техника.
Повеќе од сто ментори на учениците ќе бидат присутни на натпреварот, а оценувачките комисии се составени од наставници, универзитетски професори и соработници. Добиените дипломи се вреднуваат за стипендии што ги доделува Министерството за образование и наука на Република Македонија.
„Републичкиот натпревар на млади техничари и природници, по 51 пат, на едно место ќе ги собере талентираните основци во природните и техничките науки. Тие ќе имаат можност да ги презентираат своите проекти на кои што работеле заедно со нивните наставници во текот на оваа учебна година, но истовремено да стекнат и нови знаења од областите во кои што се натпреваруваат. Натпреварите имаат цел да го поттикнат иновативниот дух кај младите и што е најважно, уште од најрана возраст да ги развивијат нивните презентациски и натпреварувачки способности. Многу од нив потоа се успешни професионалци. Едноставно нема ниту една успешна личност од науката, техниката, иноваторството и ниту едно значајно име во електрониката, градежништвото, машинството, архитектурата, информатиката кое своите почетоци не ги врзува за овие натпревари“ – вели проф. д-р Христина Спасевска, претседател на Сојузот на здруженија за техичка култура на Република Македонија – Народна техника.
Натпреварите се поддржани од Министерството за образование и наука на Република Македонија, Локалната самоуправа на општина Пехчево и Електрани на Македонија.