Денеска (30 јуни, понеделник) во 19:00 во Магазата во Битола ќе се одржи манифестацијата „Визуелна антропологија“ – проекции на етнолошки документарни филмови – избор од меѓународниот фестивал на етнолошкиот документарен филм, што се одржа во Кратово 2013 година, а во организација на Македонското етнолошко друштво.
Визуелната антропологија своето потекло го има од крајот на 19 век, но сеуште го нема добиено своето пошироко прифаќање. Филмовите од визуелната антропологија ги снимаат антрополози, етнолози и документаристи. Со филмовите од визуелната антропологија сме во можност да правиме компарации со нашата социокултурна средина, како и да комуницираме со нови сознанија на слики кои не опкружуваат. Антропологијата на визуелната комуникација се заснова на претпоставки да ги воочиме видливите и сликовни светови како општествени процеси.
Првите почетоци на визуелната антропологија кај нас и пошироко во регионот се снимените материјали од браќата Манаки. Хронолошкиот развој на снимањето етнолошки документрни филмови во Македонија бележи периодични остварувања со тенденција во современиот миг да ги следи денешните развојни методи и пракса во организирање на многубројни фестивали.
1.Кадрирањето на другите, 25 мин. Етиопија, Холандија, 2011 година
Режија Вилем Тимерс, Илја Кок
Племето Мурси живее во басенот на реката Онто во Етиопија. Жените од племето Мурси се познати по тоа што вметнуваат големи плочи во нивните долни усни и носат богато украсени минѓуши. Сето ова стана туристичка атракција. Секоја година стотици туристи од западните земји доаѓаат да ги видат несекојдневно украсените домородци.
2. Амер го доби својот пиштол, 58 мин. Израел. 2012
Режија Наоми Левари, Сар Јогев
Амер Абу Риа само што не стапил во војска. Спротивно на повеќето 19- годишници во Израел за кои служењето во војска е задолжително, Амер е изземен од служењето војска под претпоставка дека неговото служење во војска може да го загрози израелското општество.
Проектот е подготвен од Н.У. Завод и музеј Битола, Музеј на Македонија, Дебатно кино Контра кадар и Бит Фест, а организатор е: Наде Геневска Брачиќ, етнолог, кустос-советник во Н.У. Завод и музеј Битола.
Гостин: Др- Владимир Боцев, етнолог, кустос – советник, Музеј на Македонија