Вчера вечер започна 49-то издание на театарскиот фестивал „Војдан Чернодрински“ во Прилеп …
Со доделување на наградите за животно дело синоќа во Центарот за култура „Марко Цепенков“ во Прилеп почна 49. Театарски фестивал „Војдан Чернодрински“. Годинава наградите им беа врачени на тројца актери – доајени на македонската театарска сцена – Снежана Стамевска од Драмскиот театар во Скопје и Салаетин Билал и Мустафа Јашар од Турскиот театар.
– Оваа награда е дел од вас. Поради вас, публиката, сме овде, а вие знаете тоа добро да го процените, истакна Билал заблагодарувајќи се за наградата за животно дело.
Градоначалникот на Прилеп, Марјан Ристески нагласи дека е голем бројот на уметници кои со годините останале запаметени со изведбите на оваа сцена.
– Овој настан е голема потврда дека уметноста е најсигурното средство со кое човекот се издвојува во светот, но и средство со кое се сплотува меѓу себе. Затоа, имаме особена чест да го поздравиме и да го помогнеме овој фестивал кој ни го доближи театарот, таа естетска игра, тој влез во непознатото, рече Ристески.
По свеченото отворање беше изведена првата од 12-те претстави во официјалната конкуренција за награди – претставата на Битолскиот театар „Хеда Габлер“ од Хенрик Ибзен, во режија на Ѕвездана Ангеловска.
Во Центарот за култура беа отворени и две изложби. Едната на карикатури на авторот Василие Поповиќ-Цицо и ретроспективната на ликовната колонија „Де Ниро“.
извор МИА