Нокаут, Сашко Коцев, Репортерс и Ептен се само дел од програмата на годинешниот Т’к Так Фест во Кавадарци …
Еден од најдобрите македонски поп-рок бендови на сите времиња, големите „Нокаут“, заедно со Сашко Коцев, новинарскиот рок состав „Репортерс“, минатогодишните победници, бендот „Ептен“, младите кавадаречки рок надежи „Џоа бенд“, како и DJ Freak i DJ Lako ќе бидат дел од ревијалната програма на третото издание на „Т’к Так Фест“ кое на 30-ти август ќе се оддржи во Кавадарци.
„Чест и задоволство ни е што и годинава ќе имаме можност да им понудиме на кавадарчани, но и на граѓаните на цела Македонија одлична забава. Имаме одлична програма, со интересни и звучни имиња, шоумени, и секако врвни музичари“ – вели Марко Матиев од организациониот одбор на Т’к Так Фест.
„Нам како организационен одбор ни е драго што и годинава ќе имаме можност да промовираме исклучиво македонска музика, но и да промовираме млади бендови, што беше и една од животните мисии на патронот на фестивалот, Трајко Каров. „Нокаут“ се „Нокаут“, едни и единствени, за прв пат во Кавадарци ќе ги слушнеме и „Репортерс“, новинарската екипа во која членуваат Жарко Димитриовски, Борјан Јовановски, Петрит Сарачини, Драган Антоновски, Стојан Трпчевски и Миле Бошњаковски, а свој концерт ќе имаат и минатогодишните победници, бендот „Ептен“. Премиерно во Кавадарци со 45 минутно стенд ап шоу ќе настапи еден од најдобрите актери во последните неколку години во Македонија, Сашко Коцев. Нема да изостанат и „хероите“ од кавадаречката сцена, па така годинава ќе ги видиме младите рок надежи, „Џоа бенд“ и најдоброто од кавадаречката клупска сцена, DJ Freak и DJ Lako“ – продолжува Матиев.
Покрај ревијалниот, традиционално и оваа година фестивалот ќе има натпреварувачки дел на кој демо бендовите од Македонија покрај за Гран При наградата Трајко Каров која е во вредност од 30000 денари, а се доделува на најдобриот тапанар, ќе имаат можност да добијат ексклузивна можност за соработка со Гени Каревски, Зоран Алексиќ и Јордан Манов.
Третото издание на „Т’к Так Фест“ ќе се оддржи на 30ти август, на градскиот базен „Ал Пачино“ во Кавадарци, со почеток од 21 часот.