Дневни настани во рамките на манифестацијата „Топол културен бран“ која се одвива на територијата на цела Македонија…
Во рамките на манифестацијата „Топол културен бран”, која со поддршка на Министерството за култура веќе седум години се одржува во општините низ земјава, за претстојниот голем македонски празник „Илинден“ ќе биде организира богата културно-уметничка програма.
Во Крушево, по повод престојниот празник „Илинден“ денеска во 18 часот свечено ќе бидат дочекани коњаниците кои ќе пристигнат од различни делови на нашата земја, а во 20 часот на градскиот плоштад ќе започне богата културно-уметничка програма со која ќе се означи крајот на манифестацијата „Крушево етноград“.
Во рамките на програмата предвидени се неколку драматизации во изведба на учениците од ООУ„Гоце Делчев“ од општина Аеродром-Скопје, а потоа ќе настапат играорците од КУД „Лисиче“-Скопје, како и музичките интерпретатори Перо Цаца и Рубинчо Благадуша. На свеченото затворање на манифестацијата „Крушево етноград“ ќе настапат и играорците од повеќе европски земји кои беа дел од традиционалниот летен фолклорен семинар. Гостите ќе изведат македонски ора од нашата богата фолклорна традиција.
Со прославата на големиот празник „Илинден“ и започнувањето на научните средби „10 дена Крушевска република“, Крушево и во наредните денови ќе биде атрактивна туристичка дестинација.
Селото Владимирово, беровско ќе биде местото каде на 1-ви август со почеток во 21 часот концерт ќе одржи естрадниот уметник Ефто Пупиновски. Следниот ден, пак на плоштадот во Берово во истиот термин ќе настапат поп изведувачите Тијана Дапчевиќ и Димитар Андоновски. Веќе на 3 август овие познати уметници ќе настапат и во Претор општина Ресен.
Селото Љубојно, општина Ресен по повод илинденските празнувања во недела ќе биде домаќин на традиционалните иселенички средби.Посетителите во Дојран пак во 20 часот ќе можат да ја проследат изложбата на фотографии на Митко Шимов, а во 21 часот на градската плажа концерт ќе одржи поп пејачката Кристина Арнаудова. Вечерта ќе ја заокружи настапот на популарната рап група „Слаткаристика“.