Со концертот на хрватскиот состав „Антенат“, вечер (8 јуни 2013 година, сабота), во 20 часот, официјално ќе биде отворена втората сезона на Градската плажа „Камен мост“.
Составот „Антенат“ и музиката која тие ја творат е гаранција за одлична забава, а за засилување на позитивните вибрации на овој концерт ќе се придружат младите реге сили Коноп и Гето руди.
Хрватскиот состав кој во моментов е на балканска турнеја, прв пат доаѓа во Скопје и тоа со самостоен концерт. Бендот Антенат, по двата успешни албуми, „Subing“ и „Караван“ и над 300 концерти во регионот и Европа, доаѓа за да го промовира својот нов албум насловен „Излет”.
„Антенат“ направи патување до нов звук, нови музички правци со кои го збогати својот субреге мозаик; излет на лајв-свирка, бидејќи единаесетте нови песни се снимени во живо; патување до нови соработки со старите пријатели: на албумот гостуваат Жулиен Бордиер (Julien Bordier (бенд Joke)) и Ана Фабијаниќ, а виолончело свири Станко Ковачиќ.
Ова е само почеток на уште едно жешко лето на плажата, а наскоро ќе биде објавена и целосната програма. Во текот на овие четири месеци планирани се киновечери и проекции на култни македонски и странски филмови, фестивал на кратки филмски форми, изложби на млади уметници и фотографи, спортски турнири, матине и караоке забави.
Градска плажа „Камен мост“ располага со 5 урбано наместени шанкови за продажба на храна и пијалаци, една голема бина што се наоѓа над реката по средината на плажата и со 157 квадратни метри површина платформи(декови)за поставување маси и столови за потрошувачите и рекреативците. На располагање и ова лето стои и одбојкарското игралиште, како и огромниот простор од 1000 квадратни метри чиста морска песок и камчиња.