Со германскиот игран филм „Рафи“ во режија на Аренд Агте, денеска (среда) на пладне (12 часот) во Кинотеката ќе почне филмската програма за деца „Кино утро“ што се организира секоја година за време на зимскиот распуст.
Програмата за најмладата публика до 18 јануари ќе прикаже десет играни и анимирани филмови од понова продукција, главно европски – од Германија, Данска, Италија, Романија, Австрија, Франција, но и анимирани од Јапонија.
Утре (четврток) на пладне (12часот) ќе биде прикажан романскиот анимиран „Улица на надежта“, а во наредните денови на програмата се: „Центарот на мојот свет“; „По стапките на мојот татко“; „Господинот Мол и фабриката за чоколадо“; „Помош, ги смалив родителите“; „Мираи“; „Хакер“; „Двојна неволја и магичното огледало“ и „Момчето фантом“ со кој на 18 јануари ќе заврши програмата“.
Влезницата за проекциите е 100 денари.
