Јана Стојановска доби награда за најдобра женска улога за краткиот филм “Епизодист“ на второто издание на фестивалот “Silent River Film Festival” кој се оддржа од 11-14 октомври во Irvine, California.
Филмот беше номиниран во две категории, за најдобар краток филм на фестивалот и за најдобра женска улога во краток филм. На фестивалот во краткометражната категорија се натпреваруваа 31 филм од 10 држави во светот.
Ова е трета награда за краткиот филм “Епизодист“ кој е во режија на Игор Алексов а во продукција на “Квазар филм“ од Скопје. Претходно филмот е награден на Скопскиот филмски фестивал за најдобро краткометражно остварување и на “Holly Shorts” каде што ја доби наградата за најдобар интернационален краток филм.
“Епизодист“ е горчлива приказна за две различни времиња, два политички различни система, две различни судбини на еден ист лик околу кој, злото, лицемерието и суровоста на моќта остануваат исти. Злоупотребата на силата и моќта за да се добие посакуваното без разлика дали ќе биде уништен еден човечки живот, неговите соништа и идеали, е основната линија во приказната на овој краток филм.
Краткиот филм “Епизодист“ е приказна од Александар Русјаков, продуцент е Блаже Дулев (Квазар филм), директор на фотографија е Душан Кардалевски, сценограф е Влатко Зафирковски, монтажер е Тања Рибарска (Квазар филм), костимите се на Раде Василев, музиката е на Доријан Јовановиќ, шминката е на Жанета Димитриевска, дизајн на звук е Дарко Спасовски – Пацки (Квазар филм), пост продукција на слика е Ванчо Мираковски (Квазар филм), а анимацијата и специјалните ефекти се на Александар Стојановски (Квазар филм).
Во филмот покрај Јана Стојановска играат уште: Силвија Стојановска, Предраг Павловски, Игор Ангелов, Славица Јовановска, Кирил Ристески и Благица Трпковска.
