Домот на културата „Тошо Арсов“ и Советот на Фестивалот за хумор и сатира „Ин Виница Веритас“ од Виница распиша конкурс за карикатура на тема „Уметност“.
Во пропозициите се истакнува дека еден автор може да учествува со најмногу три карикатури.
– Годинава темата на фестивалот е „Уметност“ и ќе доделиме три награди, од кои првата 300 евра, втората 200 и третата награда 100 евра. Наградите ги обезбедува Домот на културата „Тошо Арсов“ од Виница, истакна директорот на домот Славко Данев.
Тој потенцираше дека творбите во формат А3 и А4 треба да бидат испратени најдоцна до 26. септемеври на адреса на фестивалот. Наградените автори наградите ќе ги добијат на отворањето на Фестивалот за хумор и сатира „Ин Виница Веритас“ што ќе се одржи од 13 до 17 октомври 2014 година. Фестивалот кој шеста година по ред се одржа во Виница финансиски го помогнаа Министерството за култура и Општина Виница.
