Вечерва (сабота, 5 јули) со почеток во 21:00 часот во Пацио – Завод и Музеј Битола, ќе може да ја проследите претставата „ФАКТОР ЖЕНА“ …
„Фактор Жена“ е заеднички проект на Together Macedonia која секогаш ги поддржува креативните независни уметници и воедно овозможува да се оствари секоја иницијатива од страна на младите луѓе и од друга страна театарската група „Без Маска“, создадена од млади креативци, која функционира на Битолската сцена веќе 4 години, а може да се пофали со многубројни успешно реализирани театарски проекти.
Претставата опфаќа женски животни приказни, работени по вистински случки, одлуки донесени од страна на жените, а гледани низ призмата на мажите, предрасуди, осудувања, стереотипи се само неколку од работите со кои треба да се соочат овие жени.
Приказна која ги опфаќа вечните проблеми на жените кои се најизразени во 21 век, кога и покрај слободата на изразување живееме ограничени од стегите на општеството. Оптоварувајќи се со туѓите проблеми луѓето забораваат да размислуваат за себе си и за својот живот. Најлесно е да се осудуваат туѓите постапки. Тешко е да се биде човек.
Во време кога секој вртоглаво се впуштил во трката „да се биде“, претставата е одлично освежување и потсетување на суштинските и моралните вредности и искрените емоции кои некако почнуваат да се забораваат.
Опфатените теми од секојдневието за постарите претставуваат вистинско déjà vu, а за младите неизбежна реалност.