Денеска, на плоштадот Македонија, се одржа голема детска забава под маски „Априлијада 2014-Скопје се смее“, што традиционално е во организација на Детски културен центар „Карпош“ и Град Скопје.
На забавата беа присутни градоначалникот на Град Скопје, Коце Трајановски и претседателката на Советот на Град Скопје, Ирена Мишева.
– Би сакал да ги поздравам најмалите и најмладите скопјани коишто денеска се собрани овде на плоштадот Македонија. Под мотото СКОПЈЕ СЕ СМЕЕ, секоја година го одбележуваме 1 април, денот на шегата и на овој начин и нашето Скопје се приклучува кон сите европски градови коишто го прославуваат овој ден. Во публиката гледам многу маскирани дечиња и така треба, зашто на 1-ви април, дозволено е да проработи имагинацијата и креативноста и сите ние да и се препуштиме на музиката, забавата и смеата, што ќе трае се до доцните вечерни часови, истакна градоначалникот Трајановски.
Првиот дел од Манифестацијата „Априлијада“-Скопје се смее е наменета за сите училишта, градинки, деца и граѓани на град Скопје и на околината. Дел од учесниците во дневниот дел на Априлијадата 2014 година беа маскираните волшебници, пирати, гусари, принцези, пеперутки, самовили, пчелички, бетменовци, спајдермени, доктори, витези, невести, индијанци и каубојци од неколку скопски основни училишта и градинки како: ОУ „Крум Тошев“, ОУ „Свети Кирил и Методиј“, градинката „Корчагин“ и градинката „13 Ноември“ и уште многу други образовни институции.
Во дневниот дел од забавата со маски, продефилираа многу кловнови, балони, песнички, игри, забава со фолклорната секција на ДКЦ „КАРПОШ“, децата од Златно славејче и Танцови групи од основните училишта од Скопје и од околината.
Ноќната забава ќе почне вечер, во 21 часот и на плоштад Македонија, ќе настапат: Драган Мијалковски, Александар Митевски, 4 Strings, Коста Костовски, Sax & Sex , Александар Белов, Елена Миленковска, маскираните посетители ќе продефилираат на сцената, а ќе има и други изненадувања. Водители на забавата ќе бидат Марија Петровска и Антонио Димитриевски, а за крај настап ќе има Диџеј БАБУРА.
