Промоција на книга од Владимир Мартиновски во Градската библиотека „Браќа Миладиновци“- Скопје, денес во 12 часот …
Промоција на книгата „Зоон поетикон – аспекти на современата македонска поезија“ од Владимир Мартиновски, добитник на наградата за литературна критика „Димитар Митрев“ на ДПМ за 2013 година. Промоцијата ќе се одржи на 10 април (четврток) 2014 година со почеток во 12.00 часот во Градската библиотека „Браќа Миладиновци“- Скопје.
За награденото дело ќе говори проф. д-р Соња Стојменска – Елзесер а фрагменти од книгата ќе интерпретира актерот Томе Витанов.
Владимир Мартиновски е поет, раскажувач, есеист, теоретичар, преведувач. Работи како вонреден професор по предметот компаративни поетики на Катедрата за општа и компаративна книжевност, при Филолошкиот факултет „Блаже Конески“.
Автор е на повеќе книги есеи, книжевно – теоретски студии и книги поезија. Добитник е на наградата „Браќа Миладиновци“ за 2010 година.
Наградената книга „Зоон поетикон – аспекти на современата македонска поезија“ претставува вредно збогатување на македонската критика и херменевтика на поетското творештво. Во книгата се поместени триесет есеи кои зафаќаат широк спектар поетски објави од различен вид и тие се напишани со истенчено чувство за поетската уметност.