Вчера вечер (среда, 19 септември, 2012 година) беа доделени наградите на „Манаки скрипт корнерот“ во Битола.
Четиридневната работилница се одржа во присуство на тројца експерти. Совети и помош во развој на сценарија дава: Анита Форхам, д-р за сценарија од Холандија, Рик Вермулен од Холандија, кој одржа сесија по пичинг (pitching) и Себастијан Делои, продуцент од Белгија. Според нивната одлука доделени се следниве награди:
1. награда од 1.500 евра
Вардан Тозија, Македонија, со „Безимени“
2. награда од 1.000 евра
Дениса Попа, Романија, „Пејзаж со камила и мечка“
Останатите учесници во проектот беа:
Антонио Митриќески – „Децата на зимското сонце“, Македонија
Базил Калил – „Викенд во Газа“, Велика Британија
Љупчо Тодоровски-Упа – „Мајсторот“, Македонија
Наградите ги додели Мариет Шурман, амбасадорка на Кралстовото Холандија, во присуство на претставниците на Фестивалот.
Сценариското катче е најнов проект на Интернационалниот фестивал на филмска камера „Браќа Манаки“, чија цел е да ги потпомогне, промовира и да ги обучи младите филмски автори. Сценариското катче „Браќа Манаки“ е поддржано од Амбасадата на Кралството Холандија и од Македонскиот филмски фонд.
Досега 9 проекти биле развиени во филмови во рамки на оваа програма, од кои два се реализирани („Жената која ги избриша солзите“ на Теона Стругар Митевска со премиера на Берлинскиот филмски фестивал и „Утре денот доаѓа“ на Минг Ли Чанг), додека три се во претпродукциска и постпродукциска фаза како „Соба за пијано“ на Игор Иванов, „Мајкл Џексон“ на Дарко Лунгулов, „Баиконур“ на Веит Хелмер.
Денешниот ден (четврток, 20 септември) поминува со исклучително богата филмска и додатна програма, како тркалезната маса во партнерство со Капитал, Како до повеќе и поголеми спонзорства во културата и Првата балканска конференција за кинематографери која во хотелот Епинал се одржува во асоцијација со ИМАГО.
Сите филмофили утре ќе имаат единствена можност да поразговараат со г-динот Лучано Товоли, добитник на високата награда „Златна камера 300“ од 13:30 часот во Малата сала во Центарот за култура во Битола.