Во понеделник (4 јуни 2012 година) со почеток во 11:00 часот, Зоо Скопје ќе се дружи и забавува со дечињата без родителска грижа сместени во згрижувачки семејства. Настанот го реализираат Црвениот крст на град Скопје во соработка со Меѓуопштинскиот центар за социјална работа Скопје и Зоолошката градина Скопје во рамките на одбележувањето на Денот на згрижувачки семејства.
Настанот ќе се реализира во креативниот центар во Зоолошката градина Скопје. Во ова катче, децата и волонтерите на Црвениот крст ќе реализираат креативни работилници (цртање, боење, изработка на оригами), а потоа ќе имаат можност да прошетаат во Зоолошката градина, да ги погледнат животните и да се дружат.
Со овој настан ќе се потрудиме да се побудат повеќе детски насмеки, а традицијата со сигурност ќе ја продолжиме и наредните години, велат од Зоолошката.
Активноста е во рамките на проектот за социјализација на деца и млади со посебни потреби поддржан од Комерцијална банка а.д. Скопје.