Возилата на Гугл од понеделник во Македонија, Гугл стрит вју најпрво за Скопје и Битола …
Почнувајќи од понеделник, на 29 септември улиците на Скопје и на Битола ќе бидат снимени со специјализираниот автомобил на Гугл од каде ќе се фотографираат улиците за панорамски фотографии од 360 степени. По Скопје и Битола, на ред ќе бидат и улиците на Куманово, Прилеп, Тетово, Охрид и останатите градови и села.
„Планираме да покриеме колку што е можно повеќе од патната мрежа во текот на наредните неколку месеци“, велат од Гугл.
Стрит вју (Street View) е дел од Гугл мапс (Google Maps) кој ви овозможува да ги видите улиците одблизу со панорамски фотографии од 360 степени. Македонија ќе биде 60-та земја во која Гугл ги праќа своите специјализирани автомобили. Ваквото одблизу претставување на градовите на Гугл мапс има големо значење и за развојот на туризмот.
Се очекува дека првите фотографии ќе бидат достапни веќе за еден месец. Она што е исто така битно е дека Гугл за овој потфат веќе ги договорил сите детали и со Дирекцијата за заштита на лични податоци на Република Македонија во однос на заштита на приватноста на граѓаните за време на снимањето. Тоа значи дека личните и осетливи информации нема да бидат прикажани на фотографиите, односно лицата на граѓаните и регистарските таблички ќе бидат замаглени на сите слики.
Министерот за информатичко општество и администрација Иво Ивановски изјави: „Ми претставува особено задоволство дека благодарение на Гугл стрит вју светот може да ја види Македонија во нова димензија, преку компјутери или смартфони. Ова е од особено значење за туризмот и ќе придонесе кон подобро позиционирање на Македонија на светската мапа на атрактивни дестинации, каде убавината на земјата може да се види преку кој било уред приклучен на интернет“.