Второто издание на „Здраво Млади!“ ќе се одржи на 24 и 25 мај во МКЦ. Покрај веќе најавените Prinzhorn Dance School, Rebolledo и Matias Aguayo, листата на изведувачи се надополнува со следниве 3 бенда:
Electricity in our homes (Англија)
Stuttgart online (Србија)
СИЗ (Македонија)
„Electricity in Our Homes“, се основани и творат во Лондон, Англија. Прагматични во своите видици и во својот звук и концизни во своите настапи, тие честопати се движат на границата на хаосот. „Electricity In Our Homes“ е бенд кој знае да „игра“ со жанровите на начин кој воодушевува. Имаат издадено неколку EP-a и 7″ изданија за куп издавачки куќи како Modern Pop, Too Pure, Waks, PLR, Sweatshop, 4AD.
Нивниот прв албум „Dear Shareholder“ излезе во февруари 2012 за Fierce Panda Records (Art Brut, Death Cab for Cutie, Shitdisco…).
http://www.myspace.com/electricityinourhomes
http://www.youtube.com/watch?v=rqaphXuoGHY
Stuttgart Online се оформени во 2006 година. Доаѓаат од Белград, соседна Србија. Веб магазинот ПОПБОКС ги прогласува за дебитанти на годината во 2007. Во 2009 го издаваат својот деби албум „Radost svakom domaćinstvu“ за издавачката куќа „Одлични хрчак“. Следуваат настапи и турнеи во секој агол на бившата ни држава каде што бендот создава квалитетна и бројна фан база.
„Права ствар“ е името на новиот албум кој е снимен во текот на 2011 а издаден годинава. Албумот содржи 11 песни и претставува (според зборовите на авторите) полнокрвна рок плоча со голем број на идни хитови.
На Здраво Млади доаѓаат да го промовираат новиот албум, а кој ги гледал знае дека се работи за ултра енергично дуо кое испорачува енергија на која и ЕЛЕМ може да и позавиди, а секој концерт го свири како да му е прв.
Stuttgart Online се Бојан Слачала и Марко Баришиќ.
http://www.myspace.com/stuttgartonline
http://www.youtube.com/watch?v=DahlnDUu9Gg
Здраво Млади е фестивал на кој се презентира и нова музика и не за џабе мотото на фестивалот е “new music first”, па следствено на тоа во програмата се вметнати и ултра свежите СИЗ!
СИЗ е нов бенд од Куманово составен од Ивица Димитријевиќ гитара и вокал (гитарист на повеќе поранешни кумановски бендови Сизифс Ворк, Yorkshir , HIP и сегашен гитарист на култниот бенд Т.Б Трачери) и Филип Станчевски на тапани инаку исто член на Хипнополис од Куманово. Музиката на СИЗ е инспирина од разни музички правци и разни изведувачи и едноставно не може да се сврсти во ниеден музички жарн. Ако веќе треба некако да се крсти жанрот во кој би припаѓале тоа би било avant-garage или можеби neo-bopism .
Бендот моментално работи на материјалот за деби албумот.
http://soundcloud.com/siz-4
Наскоро со уште нови имиња, информации за продажба на билети, детали околу фестивалот. Следете не на www.zdravomladi.com .