Кинотеката на Македонија во соработка со Институтот Гете, почнувајќи од 8-ми до 18-ти јануари ќе прикаже пет филма снимени според бајките на браќата Грим (Вилхелм и Јакоб), придружувајќи се на прославата на јубилејните 200 години од нивната збирка „Бајки за деца“, објавена на 20 декември 1812 година.
– На тој начин децата ќе дознаат многу повеќе за госпоѓа Холе, Пепелашка, Снежана, бременските музиканти и сите други херои од бајките на браќата Грим, кои се задолжителна лектира за секое дете во светот, а се дел и од светското културно наследство и во списокот на пишувано културно наследство на УНЕСКО. Бајките на Грим се и подлога за безброј филмски адаптации, соопштија од Кинотеката.
Петте филмови се германска продукција, ќе се прикажуваат од 12:00 часот. Филмот што во вторник ќе го отвори утринското кино од циклусот „Волшебниот свет на браќата Грим“ е „Пепелашка“ во режија на Уве Јансон, снимен во 2011, кој ќе биде прикажан и на 9 јануари.
На 10-ти и 11-ти јануари ќе има проекција на „Масата, магарето и стапот“ на Улрих Кониг од 2008, на 12-ти и 14 јануари „Снежана“ на Томас Фројнднер од 2009, додека на 15-ти и 16-ти филмот „Госпоѓа Холе“ на режисерот Бодо Фурнајзен од 2008 година. На 17-ти и 18 јануари ќе биде прикажан „Бременските музиканти“ режиран од Дирк Регел во 2009-та.