Bturn promo party pt. 1 – промоција на меѓународниот онлајн културен магазин

Промоција на Mеѓународниот онлајн магазин преку промотивниот настан Bturn promo party pt. 1, кој ќе се одржи вечерва (петок,16 декември 2011 година) во клубот Папаја.

Радио емисијата Музика и Политика започнува соработка со меѓународниот културен онлајн магазин B-turn, а како почеток на таа соработка е серијалот промотивни настани кои ќе бидат сочинети од комбинација на диџеј и живи настапи на современи балкански и домашни музичари, диџеи, видео артисти, а исто така и изложби на уметници, преку кои на локалната публика ќе го претставиме пресекот на најсвежата балканска музичка/филмска/уметничка сцена. Серијалот започнува со промотивниот настан Bturn promo party pt. 1 каде ќе ја претставиме белградската диџеј дама Тијана Т., а со жив настап ќе се претстави и најдобриот извозен хаус/техно проект Јертон. Локалната диџеј поддршка ќе биде на Тони Димитров, а изборот на видео проекциите на Јане Алтипармаков.

Ова е првиот во низата планирани настани кој ќе продолжат на месечна основа, а наскоро ќе бидат објавени имињата на артистите кој ќе ги претставиме во следното издание на овие промотивни забави, веќе следниот месец. Емисијата Музика и Политика во магазинот Bturn редовно ќе партиципира со свои ставови и текстови кој ќе можат да се проследат на самиот магазин на http://bturn.com/category/magazine

Организатори и куратори на проектот Тони Димитров и Јане Алтипармаков

Што е Bturn?

Bturn е меѓународен онлајн магазин кој презентира прецизно избрана селекција на современа Балканска и Источно Европска култура, која опфаќа музика, филм, уметност и дизајн, како и голем број на социјални прашања, од образование до дрога и сексуалност.

Ние сакаме да понудиме свеж, „стрејт форвард“ пристап кон комплексноста на овој диспаратен културен простор на начин кој е во исто време забавен, едукативен и ангажиран. Нашата цел е да обезбедиме информации, но над се да презентираме нешто што сметаме дека е специфично искуство од Балканот.

Повеќе од еден век, терминот “Балкан” е овековечен преку повеќе референци – географски, културни или политички – чии параметри останаа флуидни и непостојани, но сепак поврзани со низа историски и современи факти, што го прават животното искуство во целата област од Љубљана до Истанбул, особено “Балканско”.

Досега, Балканот е познат како терен на борба, не само како конфликти и војни, но и како и борба на проектирани слики и желби. Балканот секогаш е “замислен”, од надвор и од внатре, своите ментални и географски граници се некако осудени на лизгање во сферата на нејасната Другост, тој темен потконтинент на цивилизираниот европски свет. Многумина ќе тврдат дека Ориенталната Балканска парадигма денес е далеку од исчезната. Дали денес лежи скриена зад трансглобалната егзотичност, одбивајќи го погледот на Западниот турист назад кон себе? Искрено, не ни е грижа. За нас, Балканот е каде што се случуваат глупостите. И тоа ни се допаѓа!

Листата на уметници и места кои ќе видите во базата на Bturn во никој случај не е исцрпна. Тоа не е сеопфатна листа, туку само нашиот скромен избор за кој мислиме дека го одразува богатството на современата урбана култура во регионот.

***

ПРОГРАМА

Bturn promo party pt. 1

петок, 16 декември 2011, почеток 23 ч.
клуб Папаја

Tijana T (Белград, Tilt/Recon Warriors)

Jerton LIVE! (Гостивар, Empro music)

Toni Dimitroff (Скопје, Greenfields)

видео: Јане Алтипармаков

+ втор ИНДИ подиум

Официјален facebook настан:
https://www.facebook.com/events/288981017810334/

***

official Bturn pre party