„Будност. Лотос“ нова стихозбирка на Весна Ацевска

Македонска поетеса Весна Ацевска деновиве пред читателите се претстави со нова поетска книга под наслов „Будност. Лотос“. Стихозбирката се појави во издание на Здружението за уметност и култура на живеење „Дијалог“ од Скопје, во рамките на едицијата „Синтези“.

„Будност. Лотос“ е седма поетска книга на Весна Ацевска која, во фазата на својата творечка зрелост, понудува слика на сложените процеси на движење и постојано менување на состојбите и соодносите што се причина за разновидноста во појавниот свет. Книгата е составена од пет циклуси кои следат внатрешна структурна линија и се групираат во тематски јадра што се во основата на еден заокружен и естетски сугестивно остварен поетски свет.

Весна Ацевска за своето творештво е добитник на низа признанија, меѓу кои и на наградата „Браќа Миладиновци“ на Струшките вечери на поезијата и наградата „Григор Прличев“ за препев. Нејзината поезија во посебни изданија е објавена на англиски, полски, српски, бугарски, турски и романски јазик. Песни од Весна Ацевска се застапени во антологии на македонската поезија објавени на 12 јазици.

You May Also Like