Пред Соборниот храм „Свети Климент Охридски“ денеска (недела, 06 јануари 2013 година) се одржа традиционалниот народен собир по повод големиот христијански празник Бадник, што е во организација на Граѓанското здружение Одбор за традиционална прослава на Бадник во Скопје, а со поддршка на Градот Скопје.
Кум на годинешното одбележување на празникот е скопскиот бизнисмен Даниел Воиновски, а здравичари – членовите на „Силви бенд“.
На традиционалното делење на Бадниковите гранчиња на платото пред Соборниот храм денеска присуствуваше и Претседателот на Советот на Град Скопје, Ирена Мишева.
– На овој ден и во годината што е пред нас да најдеме повеќе време за нашите најблиски, да не води добра мисла и да се стремиме кон остварување на нашите цели. На овој голем ден да си посакаме добро здравје, мир, среќа и успеси – порача Мишева.
Архиепископот охридски и македонски, г.г. Стефан со пригодна беседа им се обрати на скопјани и на сите добронамерници и му го предаде ќупот на новиот кум-бадникар.
– Честитајќи си го овој празник да си посакаме радоста на овој ден да допре до сите, а мирот, единството и меѓусебното почитување да завладеат меѓу нас – рече г.г. Стефан.
Здравицата за Бадник во форма на песна ја изведоа членовите на Силви бенд.
Традиционалното одбележување на Бадник пред Соборниот храм годинава се одржа по 21.пат.
