Македонскиот поет Јовица Тасевски – Етернијан деновиве беше објавен на реномираниот канадски интернет-портал „Читање на светската поезија“, а исто така беше емитуван и во популарната емисија „Светско поетско кафуле“ на радиото ЦФРО.
Насловот на прилогот е „̓Светска поезија̒ со гордост ви го претставува Јовица Тасевски – Етернијан од Република Македонија“, а нашиот автор на канадските читатели и слушатели им е претставен како истакнат поет, книжевен критичар и есеист, добитник на признанието „Восхитувачки поет“.
Уредувањето на интернет-порталот и на радио-емисијата е дел од програмата за афирмација на поезијата што ја реализира канадската асоцијација „Ворлд поетри ридинг“. Оваа асоцијација, во соработка со Културниот центар на градот Ричмонд, исто така организира и светски поетски фестивал што се одржува во мај.
Поезија од Етернијан истовремено е објавена и во сингапурската книжевна ревија „Еуноиа“. Ревијата има над илјада претплатници, кои дневно ги добиваат во електронски формат објавените поетски и прозни прилози, а ја уредува сингапурскиот поет и критичар Иан Чанг.