Градоначалникот на Град Скопје, Коце Трајановски, претседателот на Советот на Град Скопје, Ирена Мишева и директорот на ЈП „Улици и патишта“, Синиша Ивановски, во четвртокот (03.11.2011 година) го промовираа мини атлетскиот терен во СУГС „Здравко Цветковски“.
– Градот Скопје за потребите на СУГС „Здравко Цветковски“ го изгради овој мини атлетски терен и се надеваме дека истиот ќе побуди интерес кај учениците за помасовно спортување, односно дека ќе им ги збогатати наставните програми на часот по спорт и спортски активности. Минатата година промовиравме ваков мини атлетски терен во СУГС „Арсени Јовков“, денеска во ова училиште коешто слави 66 години од своето постоење, а изградбата на мини атлетски терени е во тек во СУГС „Зеф Љуш Марк“ и во СУГС „Михајло Пупин“. Се надевам дека на овие терени ќе вежбаат и некои наши идни професионалци од областа на атлетиката – истакна градоначалникот Трајановски.
Мини атлетскиот терен ги има следниве сегменти: атлетска патека за спринтерско трчање на 100 метри, патека за скок во далечина и платформа и терен за фрлање ѓуле. Атлетската патека за спринтерско трчање на 100 метри е широка 6,20 метри и долга 105 метри, поделена е на 6 патеки за трчање, а паралелно со целосната површина на патеката за атлетика е изградена една пешачка патека што ги поврзува сите терени (пристапна патека).
Пристапната патека е асфалтирана и е со површина од 150 квадратни метри.Патеката за скок во далечина е со залетиште, посипано со црвеница, широко 1, 5 метри и долго 32 метри и јама со песок широка 3 митри, а долга 8 метри. Теренот за фрлање ѓуле се состои од бетонска подлога со дијаметар од 2, 20 метри и конусен сектор широк 13 метри и долг 9,50 метри.
На терен работеа екипи на ЈП „Улици и патишта“, а од буџетот на Град Скопје се издвоени 1 100 000 денари за реализација на изградбата.
Град Скопје заедно со ЈП „Улици и патишта“, планираат вакви атлетски терени да изградат и во преостанатите училишта каде што има просторни услови во училишниот двор.
По отворањето на теренот се одржаа промотивни натпревари во трка на 100 метри и во фрлање ѓуле.