Краткиот филм „Епизодист“ во продукција на „Квазар филм“ од Скопје се здоби со уште две награди. Имено на овогодинешниот филмски фестивал Los Angeles International Underground Film Festival „Епизодист“ доби наградата за најдобар наративен краток филм и наградата за најдобра режија за Игор Алексов, режисер на овој филм.
Ова е четврта награда за краткиот филм “Епизодист“. Филмот досега е награден на Скопскиот филмски фестивал за најдобро краткометражно остварување, на фестивалот “Holly Shorts” во Hollywood, California каде што ја доби наградата за најдобар интернационален краток филм и на фестивалот “Silent River Film Festival” Irvine, California, каде Јана Стојановска доби награда за најдобра женска.
“Епизодист“ е горчлива приказна за две различни времиња, два политички различни система, две различни судбини на еден ист лик околу кој, злото, лицемерието и суровоста на моќта остануваат исти. Злоупотребата на силата и моќта за да се добие посакуваното без разлика дали ќе биде уништен еден човечки живот, неговите соништа и идеали, е основната линија во приказната на овој краток филм.
Краткиот филм “Епизодист“ е приказна од Александар Русјаков, продуцент е Блаже Дулев (Квазар филм), директор на фотографија е Душан Кардалевски, сценограф е Влатко Зафирковски, монтажер е Тања Рибарска (Квазар филм), костимите се на Раде Василев, музиката е на Доријан Јовановиќ, шминката е на Жанета Димитриевска, дизајн на звук е Дарко Спасовски – Пацки (Квазар филм), пост продукција на слика е Ванчо Мираковски (Квазар филм), а анимацијата и специјалните ефекти се на Александар Стојановски (Квазар филм).
Во филмот покрај Јана Стојановска играат уште: Силвија Стојановска, Предраг Павловски, Игор Ангелов, Славица Јовановска, Кирил Ристески и Благица Трпковска.