Нашиот познат актер Тони Наумовски, денот на театарот го прослави со светската премиера на претставата “Лисабон” во театарот Ла Мама во Њујорк.
Овој пат во режија на познатиот режисер, актер и сценарист Христо Христов по текстот на меѓународно наградуваниот автор Захари Карабашлиев. Продуцент на претставата е легендарниот Воза Риверс кој е продуцент на познатиот актер Питер Брук за Америка, а воедно и уметнички директор на Театарот “Њу Херитеџ” кој годинава слави педесет години јубилеј.
Текстот е во традицијата на големите актери на апсурдот. Во претставата станува збор за пет личности кои се среќаваат во празен простор. Секој еден од нив се стреми да избега и да биде слободен. Просторот е место на дејствието, а местото и времето на случувањето се непознати.
„Дали е ова реалност или игра на умот? Дали ќе дознаат всушност кои се? Што се? Зошто се?
Текстот ги отвара вечните егзистенцијални прашања за човечкото постоење . Во оваа претстава провејува македонска мелодија, конкретно песната “Со маки сум се родила” инкорпорирана со зборови на самиот автор.
ЛаМаМа е едно од најмаркантните имиња во историјата на театарот, место каде што многу светски имиња како Питер Брук, Џерзи Гротовоски,Андреј Сербан, Сем Шепард, Ф.Муреј Абрахам, Мартин Шин, Роберт Дениро, Ал Пачино и многу други, ги започнале и негувале своите кариери.“
Наумовски на оваа сцена ќе настапи по шести пат.
