На денешен ден: Почина Петре Прличко

На денешен ден, 1995 година, во Скопје почина Петре Прличко, доајенот на македонското глумиште.  Петре Прличко (Велес, 13 март 1907 – Скопје, 16 ноември 1995) , сам по себе претставува вистинска легенда и е значаен дел во историјата на македонското глумиште во XX век.

Неговата ненадмината актерска харизма остави неизбришива трага во македонскиот театар и филм од 20 век. Многумина го прогласија за легенда додека се уште беше жив. Зад себе остави најмалјку 250 театрски ролји, 55 драмски режии, 50 драмски режии во патувачките театри, 32 улоги во долгометражни филмови како и 17 режии во куклени театри.

—

И покрај тоа што бил запишан во гимназија, Петре Прличко не останал долго време таму. Во 1923 година ја напушта гимназијата и се приклучува кон патувачката група на Михајло Лазиќ. Откако прошетал низ неколку театарски дружини, во 1931 година, охрабрен од начинот на кој го примила публиката, тој основа свој сопствен театар „Боем“.

Од 1939 година членувал во Народниот театар во Скопје, па од 1944 година во партизанскиот театар „Кочо Рацин“ кој подоцна прераснува во Македонскиот народен театар. Токму тука неговиот талент блеснува во полн сјај и тој станува најзначајната личност на македонската сцена во тоа време. Во меѓувреме го испробува својот талент и како театарски режисер.

Со филмот „Фросина“ (1952) тој го доживува своето филмско деби. Со своите импресивни комични трансформации и изведби на улоги на „човек од народот“ го истакнува својот посебен уметнички сензибилитет, на ниво на кое може да му завидат многу други наши глумци.

Добитник е на многу награди и признанија, меѓу кои наградите: АВНОЈ, „11 Октомври“, „Бранко Гавела“, Орден за заслуга (доделен од Георги Димитров) и други.

Во една прилика Петре Прличко изјави дека сепак ако мора да избере една улога како најдрага, тоа секако ќе биде „Манданата“ т.е. неговиот лик во филмот „Мис Стон“, за која ја доби и наградата „Златна арена“.

Филмографија