Министерката за култура подвлече дека Министерството за култура и во иднина ќе продолжи преку поддршка на квалитетни проекти да дава придонес во афирмацијата на културата и на културниот развој на градот Тетово, но и на сите други општини во државава …
Со изведба на познати арии и дуети на реномирани солисти од Македонија, Албанија и од Косово, синоќа во преполната сала на Центарот за култура „Иљо Антески-Смок“ во Тетово концерт одржа оркестарот при Македонската опера и балет, под диригентската палка на Бисера Чадловска.
Пред почетокот на концертот, пред многубројната публика се обратија министерката за култура Елизабета Канческа-Милевска и градоначалничката на општина Тетово, Теута Арифи.
Министерката за култура во своето обраќање истакна дека концертот е одлична можност за репертоарот на оваа национална институција да се доближи до тетовската публика, што е потврда на заложбите за поттикнување на рамномерн културен развој и достапност на културните програми за сите граѓани на Република Македонија.
– Градот Тетово е еден од поголемите културни центри во нашата држава, во кој традицијата и културата се негуваат со особено внимание. Токму затоа, настојуваме, преку поддршката на програмите на нашите институции, на граѓанските здруженија и истакнатите уметници, да го збогатиме културното живеење во оваа општина, да ја поттикнеме регионалната соработка во функција на остварување на квалитетна културна понуда – истакна Канческа-Милевска.
Министерката за култура подвлече дека Министерството за култура и во иднина ќе продолжи преку поддршка на квалитетни проекти да дава придонес во афирмацијата на културата и на културниот развој на градот Тетово, но и на сите други општини во државата.
Гала-концертот на Македонската опера и балет беше во организација на Министерството за култура и на Здружението за култура, уметност, спорт и рекреација „Артал“ од Тетово.
