Жири-комисијата во состав: проф.д-р Васил Тоциновски (претседател), доц.д-р Христо Петрески и м-р Марина Мијаковска (членови) ја донесе одлуката годинашната меѓународна награда Ана Франк да им се додели на: Марија Тодорова од Македонија, Божидар Просењак од Хрватска и Миодраг Јакшиќ од Србија.
Марија Тодорова е познат и признат преведувач, но и научен истражувач на литературата за деца и млади кај нас и во светот. Таа е автор на повеќе оригинални и значајни трудови посветени на книжевното творештво за најмладите, а нејзина најнова книга е Преведувањето за деца како меѓукултурна комуникација.
Божидар Просењак е значаен хрватски писател и новинар. Автор е на голем број прозни, поетски и драмски дела, од кои некои се избрани и како лектирни изданија, а поголем број негови творби се вклучени и во учебниците. Повеќе негови книги се преведени на над 20 светски јазици.
Миодраг Јакшиќ е истакнат српски писател, кој е автор на голем број книжевни остварувања за најмладите. Застапен е во повеќе антологии и добитник е на републички и меѓународни награди за своето литературно дело. Најпозната е неговата поетска трилогија за Малиот змеј.
Наградата се доделува за врвни остварувања на планот на литературата за деца и млади, а ја доделуваат Издавачката куќа Феникс и Фондацијата за културна и научна афирмација и презентација Македонија Презент од Скопје.
Наградата Ана Франк е традиционална и досега ја имаат добиено: Криста Јохансен (Канада), Стана Смиљковиќ (Србија), Виолета Димова (Македонија), Тиодор Росиќ (Србија), Катја Ерменкова (Бугарија) и Дејан Алексиќ (Србија).
Наградата годинава се доделува по петти пат и ќе биде врачена за време на одржувањето на Меѓународиот саем на книгата во Скопје.
