Друштвото за издавачка дејност „Македоника“ од Скопје, неодамна ја објави книгата со афоризми „Крлук“ на македонскиот афористичар Атанас Крлевски. Книгата содржи близу четиристотини афоризми поделени во три циклуси, а е објавен и поговор од Ана Витанова Рингачева.
„Мислите во `Крлук`, пишува Рингачева, се сериозни, длабоко обмислени и промислени, напати мачни и непожелни за читање и слушање, но длабоко вистинити и суштествени. Тие засмејуваат, замислуваат, заведуваат, залажуваат, но пред сè и над сè отрезнуваат и освестуваат, тогаш кога нашата мисла заборавила на чија ливада пасе и тогаш кога нашата нога крадешкум фаќа друг пат… Во Крлук Атанас Крлевски грубо без формалности и нежности го допира сензибилитетот на епохата во која битисуваме, сакајќи да ги долови сите човечки малодушности и паѓања во мoментите кога желбата за бегство од реалноста е најсилна. Она што воодушевува во Крлук е силната симбиоза на текстот и контекстот, на она што авторот сака да го каже, но и одгласот на кажаното. Афоризмите на Крлевски ја цитираат стварноста, читателот има чувство дека тоа се негови зборови, едноставно читателот ја добива улогата на коавтор и со тоа го добива правото да ги цитира истите за свои потреби“, пишува Витанова Рингачева во поговорот.
„Крлук“ е трета книга со афоризми на Атанас Крлевски. Претходно ги објавил „Крлевизми“ и „Окрлавени мисли“. Атанас Крлевски (1956 година – Ташкент, Узбекистан, живее и работи во Велес) афоризми пишува три и пол децении, автор е на многу антологиски афоризми, наградуван е во земјата и во странство и е застапуван во меѓународни антологии. Објавувал во „Остен“, „Студентски збор“, „Млад борец“, „Македонски остен“, а денес соработува во повеќе печатени и електронски сатирични списанија и потрали во земјата и во странство. Меѓу другото, застапен е во неколку антологии со афоризми објавени во земјата и во странство. Член е на балканското здружение на афористичари. Добитник е на неколку награди за афоризми.
