Утре вечер (петок, 21.12.2012 година) со почеток во 20:00 часот на сцената на Македонската опера и балет (МОБ), ќе се изведе оперската претстава „Кармен“ од Жорж Бизе.
Диригент на претставата е Бисера Чадловска. Режисер Кузман Попов од Бугарија, сценографија на Живоин Трајановиќ и костимографија на Марија Пупучевска. Обнова на кореографија на Екрем Хусеин.
Во улогата на Кармен ќе настапи нашиот сопран Ирена Кавкалевска која што со оваа улога ја одбележува 10 годишнината од нејзината прва улога на Кармен на сцената на МОБ. Во улогата на Дон Хозе ќе настапи Зоран Сотиров, во улогата на Ескамиљо ќе настапи Марјан Јовановски и во улогата на Микаела е Дешира Ахмети-Крлиу.
Настапува оркестарот, хорот и балетскиот ансамбл при МОБ.
————————————————————————
Синопсис
ЧИН I
Плоштад во Севилја пред тутунската фабрика. Војниците од стражарницата со нетрпение ја чекаат смената на стражата коментирајќи го раздвижениот народ. Дежурниот водник Моралес ја забележува селската девојка Микаела, која е свршеничка на водникот Хозе. Таа дошла во градот да му донесе писмо на Хозе од неговата мајка. Трубата ја означува смената на стражата. Истовремено со доаѓањето на новите војници предводени од Хозе, фабричката сирена ја означува паузата за работничките во фабриката за тутун, кои се придружуваат на народот на плоштадот. Со нив е убавата и кокетна циганка Кармен, која го забележува Хозе и со сензуален танц и песна го провоцира фрлајќи му цвет. Хозе се однесува како да не го забележува тоа, но по влегувањето на работничките во фабриката долго го гледа цветот. Тоа го прекинува Микаела која му го одвлекува вниманието и му го дава писмото од неговата мајка. Сцената ја прекинува тепачката помеѓу Кармен и една од работничките, при што Кармен со нож ја ранила. Офицерот Цунига му наредува на Хозе да ја уапси Кармен, која и покрај се делува безгрижно пеејќи сегедилја. Низ песната и играта таа му ветува љубов на Хозе ако ја ослободи. Му ветува средба во крчмата на Лилас Пастја. Хозе замаен и ги одврзува рацете и Кармен побегнува. Сето тоа го гледа Цунига кој го упатува Хозе во притвор.
ЧИН II
Крчмата на Лилас Пастја, место каде се собираат контрабандистите. Данкаиро и Рамендадо со своите пријателки Фраскита и Мерцедес ја убедуваат Кармен да им се придружи во нивните акции. Но таа е тука за да се сретне со Хозе, кој треба да излезе од притвор. Во крчмата пристигнува тореадорот Ескамилио дочекан со овации. Тој и се додворува, но Кармен го одбива. Ескамилио си оди. Пристигнува Хозе. Тие остануваат сами искажувајќи ја својата љубов еден кон друг. Сцената ја прекинува војничката труба која ги повикува војниците на повечерие во касарната. Намерата на Хозе да оди во касарната ја прекинува Цунига кој упаѓа во крчмата со намера да се додворува на Кармен. Хозе во напад на љубомора вади нож да се пресмета со Цунига. Двобојот го прекинуваат контрабандистите. За Хозе повеќе нема избор – мора да замини со контрабандистите заедно со Кармен.
ЧИН III
Темна ноќ во планинска клисура. Со контрабандистите се и Кармен и Хозе. Таа е оладена кон Хозе, без респект кон неговата голема жртва. Нејзина нова љубов е тореадорот Ескамилио. Хозе е сам покрај стоките на контрабандистите. Длабоко замислен не ни претпоставува дека неговата свршеница Микаела тргнала по него, носена од големата љубов и веста за смртната постела на мајката на Хозе. Таа се крие од појавата на Ескамилио кој е дојден на средба со Кармен. Хозе го забележува, се нафрла со нож на него и го фрла на грб, но од таа ситуација го спасува Кармен со кантрабандистите. Хозе е бесен и се нафрла и на Кармен со нож, но помеѓу нив застанува Микаела. Со голем напор таа го убедува да дојди со неа. Одалечувајќи се, Хозе се заколнува дека ќе се врати и ќе се освети.
ЧИН IV
Плоштад пред арената за борба со бикови во Севилја. Народот радосно го поздравува својот херој Ескамилио. До него е Кармен со сиот свој сјај, горда и среќна. Другарките ја опоменуваат дека во публиката е Хозе, но таа не обрнува внимание на тоа. Тргнува кон арената да ја поздрави новата победа на својот сакан. Кај влезот се сретнува со Хозе кој понизно ја моли да му се врати. Таа со презир го одбива и му го фрла прстенот кој тој и го подарил. Хозе избезумен и понижен, вади нож и го забива во градите на Кармен. Паѓа на нејзините гради во силен плач.
