Вечер (19 август, понеделник) во 21:00 часот во црквата Света Софија во Охрид, концерт ќе одржи популарниот виолинист Немања Радуловиќ од Србија, во пијано придружба на Сузан Маноф од САД.
Програма: Чајковски, Моцарт, Бах, Франк, Равел
Немања Радуловиќ се вбројува меѓу највпечатливите уметници од младата генерација на денешната музичка сцена, со своите атрактивни настапи одушевувајќи го аудиториумот. Радуловиќ е добитник на престижните награди „Јоахим“ во Хановер, „Џорџе Енеску“, „Антонио Страдивари“ „Јехуди Мењухин“, „Вијенјавски-Липински“ во Полска. Тој беше прогласен за International Revelation of the Year” од Victoires de la Musique (European Association of Artist Managers) и номиниран за “Rising Star”. Радуловиќ настапува во најпознатите светски сали: Концертгебау во Амстердам, Мегарон во Атина, Cité de la Musique во Париз, Palais des Beaux-Arts во Брисел, Филхармонијата во Келн, Карнеги Хол, како и на бројните меѓународни фестивали.
Тој свири со најдобрите светски оркестри: симфоничарите од Монреал, Рио, Барселона, Нирнберг, Филхармониските оркестри на Радио Франција, Рим, Штудгарт, Германската Државна филхармонија, Кралската Филхармонија – Лондон, Филхармонијата на Украина, Оркестарот на Романска Швајцарија и многу други. Радуловиќ редовно настапува со Мариел Нордман, Сузан Маноф, Доминик Плансад, Лаура Фавр-Кан, Ане Гастинел и со ансамблите The Devil’s Trills и Double Sens. Неговите снимки се објавени од водечките издавачки куќи TransArt Live и ArtAct-Decca/Universal, а неговиот солистички компакт диск е награден со “Diapason Découverte“. Прогласен е за Почесен доктор на Универзитетот во Ниш – Србија.