Во издание на „Дијалог“ од Скопје деновиве излезе од печат книга од познатиот македонски писател и академик Влада Урошевиќ посветена на генерацијата која ги даде големите литературни имиња: Живко Чинго, Петре М. Андреевски, Богомил Ѓузел и Радован Павловски. Книгата под наслов „Сложувалка од измазнети камења“ е објавена со предговор и коментари на Веле Смилевски.
Во своето ново дело Влада Урошевиќ прави смел меланж на повеќе видови текстови посветени на неговата дејност во кругот на генерацијата на која тој припаѓа и со децении е главниот афирматор и толкувач на нејзините специфики и вредности. Меѓу кориците на книгата за прв пат во таков обем и со таква изворност се презентира генерацискиот феномен со еден документарен, мемоарски и епистоларен слој низ записи, писма и фотографии со извонредно интересни содржини.
Во предговорот со наслов „Роман за една генерација“ Веле Смилевски пишува: „Ова е ретка книга која се потпира на документот, но е многу повеќе од тоа: текстовите од оваа книга имаат душа, некоја пулсирачка енергија од самото средиште на настаните со кои се врзани имиња на значајни писатели од македонската литература. Оваа книга е своевиден роман за една генерација. Роман каков што до сега не сме прочитале.“