Претседателот Ѓорге Иванов, денеска во вилата „Водно“, во присуство на министерката за култура Елизабета Канческа–Милевска, на Есма Реџепова-Теодосиевска свечено и ја додели титулата Национален уметник на Република Македонија, највисокото признание од областа на културата во нашата држава.
Претседателот Иванов истакна дека прогласувајќи ја Есма Реџепова-Теодосиевска за национален уметник, ние денес ја искажуваме нашата посветеност кон уметноста и трајните вредности на музиката.
– Уметниците биле, се и ќе бидат најзначајните гласници на мирот, почитувањето и разбирањето. Низ уметноста, тие ги надминуваат сите граници и недоразбирања и невозможното го прават возможно. Тоа најдобро го покажува Есма – рече претседателот Иванов.
Министерката за култура Канческа-Милевска, во своето обраќање пред присутните додаде дека Есма Реџепова-Теодосиевска со своите многубројни изведби и креации, со својот талент и умешност создаде вредности кои се наш печат за идентификација во светот.
– За Есма Реџепова може да се зборува многу. Таа е веќе лесно препознатлив македонски бренд. Нескромно ќе забележам дека не постои континент и нема земја во светот која Есма Реџепова ја нема освоено со својата песна, со својот раскошен глас, со својот темперамент. Голема и неповторлива, кралицата на ромската песна и иконата на македонското музичко поднебје, живее со репутацијата на светски уметник со импозантна кариера која трае цели педесет и пет години – истакна Канческа-Милевска.
Титулата „национален уметник“ се доделува во согласност со Законот за национален уметник на Република Македонија, а досегашни добитници на титулата се музичкиот уметник и пијанист, Симон Трпчески и сценаристот и режисер, професор Милчо Манчевски.
