Во летниот клуб „Хавана“ се одржа, втора година по ред, еко фестивалот „Sound of green“, во организација на Друштвото за управување со отпад од пакување – „Пакомак“ во соработка со клубот „Хавана“.
Под мотото „Биди рециклајзер”, пред скопската публика настапија најдобрите македонски бендови: „String Forces“, „Новиот почеток“, „Foolish Green“ и „Conquering lion“. Она што беше интересно за посетителите е тоа што влезниците за фестивалот не се продаваа, туку секој можеше да добие билет во замена за 3 празни пластични шишиња од која било големина.
Акцијата помина успешно, беа собрани повеќе од 3000 пластични шишиња, а спојот на музиката и грижата за животната средина уште еднаш се покажа како одлична идеја. Задоволството да се биде дел од еден ваков настан не го криеја и учесниците на фестивалот, па по тој повод Дориан Јовановиќ, член на групата „String Forces“, по завршување на нивниот настап изјави: „Музичките фестивали или настани, местата каде што луѓето се собираат заеднички да учествуваат во една голема музичка изведба, секогаш имаат магиско-ритуален карактер и како такви се погодни за ширење на одредени идеологии и идеи. Кога тоа ќе се употреби за идеи и цели кои што се за добробит на заедницата секогаш ќе бидат успешни. На таков начин, „Sound of green“ беше еден успешен настан, пред се музички, но и како средство за одредено зголемување на свеста за потребата да се грижиме за околината во која живееме. На едно место се собраа луѓе и од различни генерации и од различни животни стилови, сите заедно ја прославија музиката која што ги прави среќни, и при тоа дури и неприметливо во себе ставија идеја дека пластиката може и да се рециклира.“
Акциите на Пакомак за подигање на еколошката свеста не застануваат овде. Тие и понатаму ќе продолжат да организираат настани каде ќе не уверат дека собирањето на пластичниот отпад навистина може да биде забавен.
