На 16 и 17 август (петок и сабота) ќе се одржи 25-та Поетска ноќ во Велестово. Првата вечер е посветена на младата македонска поезија, односно групен портрет на 14 млади поети, а во интернационалната ќе настапат неколку гости од странство.
Странските поети кои ќе се претстават во велестово се: Одвиг Клиф од Норвешка, Татјана Данилијанц од Русија, Поли Муканова од Бугарија, Роман Кисјов од Бугарија и Игор Тиш од Словачка. Жељко Миловиќ од Црна Гора е еден од нив, ви претставуваме негови стихови:
МАКЕДОНИЈА
Македонија е бајка
раскажана врз твоите рамења,
како она попладне на тремот од трошната куќа на кат
од бемката, каде би било Куманово,
скриена во мојот поглед низ отворот на пискливиот прозорец
па надолу каде што кожата ти ја притиска градникот
околу Штип и Виница.
Црната маичка лежи врз земјениот под,
благото прекршување на половината, на периферија од Велес,
свилестата крива под папокот, над Прилеп.
Се плашам дека некој ќе наиде додека те гледам
како се преслекуваш
и го замислувам таинственото богатство на Демир Хисар
оставено да се пронајде во некој друг живот,
зашто во овој, освојувачот своето копје веќе го забил
на освоената територија.
Македонија истекува низ охридските води
сместени меѓу твоите бедра,
а јас ја гледам, одамна само на гледање склон,
високо од врвовите на кратовските планини
како скаменет младоженец со скаменети сватови,
со црвен бајрак, што го огрева сонцето
сонцето кое
како и ти
ќе исчезне штом Велестово пак ќе заспие.
————————–
Жељко Миловиќ (1968 г.) роден во Бар, Црна Гора, СФР Југославија. Поет, прозаист, новинар, есеист, музички критичар.Од 1986 година објавува музички критики, статии и есеи поврзани со проблемите на културата и субкул–турата во многу ексју и црногорски медиуми. Од 1994 година работи во Радио Бар. Добитник е на неколку награди за радиски етно репортажи. Последниве неколку години го уредува порталот www.barinfo.me, дневен интернет весник за Бар. Автор е на повеќе текстови за песни на црногорски рок бендови и солисти. Објавил шест збирки поезија, три прозни книги и неколку монографии за Бар. Добитник е на книжевната награда „Ќамил Сијариќ“ за 2006/07 година. Членува во Здружението на книжевници на Црна Гора.